Luk 9 | LEU | STEP | Layaan na Yesus fo xel faxuvul a mu yaamut sangafilu saxa pana taragua nane tavai nari pana gutan sina e a tateaxan xena gei tapin a mu vovau saat e xena vil faroxoiaana maana rabuna aava ri giis.

Luke 9

Na Yesus A Feng Xolan A Mu Yaamut Sina

Mt 10:9-15; Mk 6:8-11

1 Layaan na Yesus fo xel faxuvul a mu yaamut sangafilu saxa pana taragua nane tavai nari pana gutan sina e a tateaxan xena gei tapin a mu vovau saat e xena vil faroxoiaana maana rabuna aava ri giis. 2 Nane feng fepatoxan nari xena kuusan fasavat a fatataganan sina Piran e xena vil faroxoiaana mu giisan. 3 Nane xuus nari, “Muta siak ta mo xena faletan simi, muta siak ta xipa o ta bi, e muta siak fanganan o faat o xasa marapi, piau. 4 A so ta lifu no laak lana, matef pave fefexaxaas no ta'ulan a bina aave. 5 Tamo pi ta rabuna ri suai sema, layaan no ta'ulan a bina siri lavaxa, saf tapin a pof la kaam. I taa malaan sena gel tifiaan nari.” 6 E voxo nari aave ri tamasiak e ri fe kuusan fasavat a Lagasai Roxo e ri vil faroxoi a rabuna la mu bina xaves.

Na Herot A Langai Se Yesus

Mt 14:1,2; Mk 6:14-16

7 A maana rabuna xaves ri ferawai se Yesus e vilaana sina. E saxanofuna ri kuus o nane ve na Jon aava fatatoi fa'ulian ti la mamaat. E xasanofuna ri kuus o nane ve na Ilaija aava fo savat fulaa e xasanofuna fulaa ri kuus o nane ve a mataa ina kuus fatuxai ti kavai aava to fa'ulaa. E layaan na Herot aava paamua ti Galili, a langai pana maana mo aanabe' a lamonan sina a tavanat e a kuus, “Nenia, ne fo patal tapin a putu Jon. Naboxo ne taxa langai pase'?” E nane vubuk xalum na Yesus.

Na Yesus A Fafangan A Mu Rabuna 5,000

Mt 14:13-21; Mk 6:32-44; Jn 6:5-13

10 Layaan a mu yaamut ri fo ulaa, ri kuusan a maana faisok siri xe si Yesus. E nane lisan nari xe la bina Betsaida xena fangaafus. 11 Taasaxa malila ri langai sena e ri usie. Nane fasusui nari e a ferawai xe siri pana fatataganan sina Piran e a vil faroxoi nari aava ri giis. 12 La leaaf xo a mu yaamut ri savat sina e ri kuus, “Feng tapin et a maana mu rabuna aanabe' talo ri tafe seng fanganan e ta nobina xena matefan siri la maana nu bina faasilak senaso taara waan nabe' la bina xobingil.”

13 E nane sui nari, “Mi tavai nari pana fanganan.”

E ri suie, “Maam toxan a fomirak bret pama e din taragua mon nabe'. Naak maam taa fe maraan bret xari xapiak, bo?” 14 (Faasilak a mu rabuna tomexaan 5,000 ri taxa waan pave la noyaan aave.)

Taasaxa nane xuus a mu fefeng sina, “Fanei fepatoxan nari lana maana xuvulaian ina rabuna sangafilu pama.” 15 A mu fefeng ri vil malaane e nari xapiak ri nai su'. 16 Nane siak a fomirak bret pama e a ro din e a kaalum xe laa'ui la xunavata e kuus faasiroxo xe sina Piran pana e viaxe. E a tavai a mu fefeng sina pana, xena fepatoxanaana la palou iri. 17 Nari xapiak ri fangan e ri maasi. A mu fefeng sina ri siak faxuvul a maana xavil ina fanganan aava waan e ri tifi a maana bi titifai sangafilu saxa pana taragua pana.

Na Pita A Kuus Famatavas Se Yesus

Mt 16:13-16; Mk 8:27-29

18 Saxa yaan, layaan na Yesus taxa fenung e mu fefeng sina ri taxa waan xuvul pana, nane fin nari, “A mu rabuna ri kuus o nenia nase'?”

19 Ri suie, “Saxanofuna ri kuus o na Jon ina Fasufan, xasanofuna ri kuus o na Ilaija e xasanofuna fulaa ri kuus o a mataa ina kuus fatuxai ti kavai aava fatatoi fa'ulian ti la mamaat.”

20 E na Yesus a fin nari, “E nami, mi lamon malaafaa? Nenia nase'?”

E na Pita a suie, “Nano, no Krais, a Mataa Failai sina Piran.”

21 Na Yesus a pebukan faagutan nari o ri muta xuus a rabuna pana. 22 E a kuus, “A Natuna Mataa i taa maasak faagut pana maana mo xaves e mu paamua priis, mu matalava e a mu rabuna ina fepitaa pana vuputkai, ri taa tisuie e punuxe. E la fatalatulaana yaan i taa fatatoi fa'ulian.”

23 E nane kuus xe siri xapiak, “Nase' ta mataa i taa usiau i muta lamon paamuin a taagulan sina e la maana yaan xapiak i taa yaas a bolo sina e i taa usiau. 24 Nase' ta mataa a vubuk tao fatateak a toyan sina, a toyan aave i taa malit taasaxa nase' ta mataa i taa ta'ulan a toyan sina xena usiau, i taa fakaxupan. 25 A mataa i taa toxan a so ta malangiis tamo i taa siak faxuvul a maana mo xaves lana taagulan sina la xavala e mui a toyan tuuna sina i taa malit? 26 Tamo mataa taa mangil sega e sena ferawaian siak, a Natuna Mataa i taa mangilane vaxa layaan i taa filimaan lana malang molava piis sina e na Tamana e mu angelo xaradak. 27 Ne kuus tuuna xe simi, saxanofuna aava ri taxa tigina nabe' ri taa pife maat paamuina yaan ri taa xalum a fatataganan sina Piran.”

A Puxaan Na Yesus

Mt 17:1-8; Mk 9:2-8

28 Na Yesus a ferawai malaanabe' e lamina mu yaan pisiktul fo falet a xel faxuvul na Pita narutul Jems e na Jon e ri fe laak xuluna put talo na Yesus i taa fenung. 29 Layaan i taxa fenung a xakaaluman ina nonau ina a puk e a marapi sina ferarapak faagut malaan sena yaamit. 30 A rovaat tomexaan aava na Moses nare Ilaija 31 re sivimaan lana malang molava ti laa'ui la xunavata e re maa ferawai xuvul pa Yesus. Rutul ferawai pana faisok sina aava i taa fataxapine pe Jerusalem layaan i taa ta'ulan a xavala. 32 Na Pita narutul xo, rutul matef maat taasaxa layaan rutul para fa'ulaa rutul xalum a malang molava sina e rovaat aava re taxa waan xuvul pana. 33 Layaan a rovaat aave re taxa ta'ulan na Yesus, na Pita a kuus xe sina, “Memai, a mo roxo maatul taxa waan nabe'. Maatul taa vesan a sawat talatul; saxa xanum, saxa xa Moses e saxa xa Ilaija.” (Nane ipul faagut sena maana mo aava savat e pife ferawai pana masaman.)

34 Layaan i taxa ferawai a vata a savat e maa xafut nari. E ri mataut layaan ri laak lana vata aave. 35 Saxa ling a ferawai ti lana vata aave e a kuus, “Nabe' ve a Lak Tomexaan siak. Ne fo siak fatie, langai sina.” 36 Layaan a ling fo ferawai xapiak ri xalum na Yesus sang mon i taxa waan. A mu fefeng talatul aave, rutul waan kasam sena e lana yaan aave ri pife xuus fatexaas a rabuna pana maana mo ri fo xalume.

Na Yesus A Vil Faroxoi A Lak Tomexaan Pana Vovau Saat

Mt 17:14-18,22,23; Mk 9:14-27,30-32

37 A yaan mui xo, layaan ri sivi ti xuluna put, a malila molava ri fefasusuie. 38 E saxa mataa la palou iri a kuus falava, “Mataa ina Fepitaa, ne nung nano o no taa xalum a lak tomexaan siak, ne pi ta saxa fulaa, nane sang mon. 39 A vovau saat a vawe e nane fuuna xukulai fa'ipul; a fuuna tapin fasivie e nane fuuna gaga e a reng fuuna savat ti la valana. I taxa lo waan xuvul pana e i taxa kawaasane. 40 Ne nung a mu fefeng siim o ri taa vil tapine taasaxa ri pife fexaxaas.”

41 E na Yesus a suie, “Aa, nami ve mu rabuna aava mi pife namkai e mi fuuna fatavanat a lamonan simi, ne taa waan xuvul pami pana yaan talavisan? Ne taa yaas a matafanan simi pana yaan talavisan? Lisanmaan a lak siim.”

42 E layaan a lak aave taxa filimaan, a vovau saat a tapin fasivie xe lapia pana radakuian. Taasaxa na Yesus a baras a vovau saat aave e a vil faroxoi a lak e lisan fa'ulie xe si tamana. 43 E nari xapiak ri ipul faagut pana gutan lava sina Piran.

Layaan a mu rabuna ri taxa ferawai pana maana mo aava na Yesus a vile, nane xuus a mu fefeng sina, 44 “Langai faroxoi a maana mo ne taxa xuus nami pana: a Natuna Mataa xo, saxa i taa pet lisane xe sina mu rabuna saat.” 45 Taasaxa mu fefeng ri pife masam sena malasuf ina ferawaian sina senaso a funan seri talo ri pife fexaxaas sena lamon texaasane. E ri mataut sena fin fulane.

Nase' A Pelalava

Mt 18:1-5; Mk 9:33-40

46 A mu yaamut xo ri taxa lo fegagelai o nase' ve a pelalava. 47 E na Yesus fo texaas sena lamonan siri e siak fatiginei a saxa lak la tana 48 e xuus nari, “Nase' ta mataa i taa fakas a lak modak aanabe' lana isaak a fakasau e nase' ta mataa a fakasau, a fakas nane aava fengau. Senaso nane aava sisiak xe simi xapiak, nane xo a pelalava.”

49 E na Jon a kuus, “Memai, maam xalum a saxa mataa i taxa gei tapin a mu vovau saat lana isaam e maam pebukane senaso nane pife waan xuvul pamaam.”

50 Na Yesus a suie malaan, “Muta pebukane senaso nari aava ri pife faisok patak semi ri taxa faisok xuvul pami.”

Saxano Rabuna Ti Sameria Ri Tisui Na Yesus

51 A yaan ina laaxan sina xe laa'ui la xunavata i taxa savatmaan faasilak e na Yesus a lamon fatateak o i taa laak xe Jerusalem e a falet xo. 52 E nane feng paamuin a mu fefeng sina e ri fe laak xe la saxa bina pe Sameria xena faigotan a maana mo xana. 53 Taasaxa mu rabuna pave ri bai fakase senaso i taxa laak xe Jerusalem. 54 E layaan a ro yaamut, na Jems nare Jon, re xalum a vilaana aanabe', re fine, “Memai, no vubuk o maame taa xel fasivi a fata ti laa'ui la xunavata xena kawaasan xapin nari?” 55 Taasaxa na Yesus a tapuk e baras nare 56 e ri falet xe la xasa bina.

Saxano Rabuna Aava Ri Vubuk Usi Na Yesus

Mt 8:19-22

57 Ri taxa sangas la salan e saxa mataa a kuus xe sina, “Ne taa usi nano tamo no falet xe faa.”

58 E na Yesus a xuuse, “A mu vupung ri toxan a mu liing siri e mu maanu laa'ui la tavegof ri toxan a mu singa siri taasaxa Natuna Mataa a pi ta nobina xena mati lana.”

59 Nane kuus xe sina xasafuna, “Usiau.”

Taasaxa mataa aave a xuuse, “Memai, ne tafe xaafan na tamaang xalak e mui ne taa usi nano.”

60 Na Yesus a xuuse, “Nari aava ri maat lana namkaian siri, ri taa xaafan su' a mamaat. E nano, no fe kuusan fasavat a fatataganan sina Piran.”

61 E a xasafuna a kuus, “Ne taa usi nano, Memai, taasaxa paamua ne ulaa xalak ne xuus a matafetama siak pana faletan siak.”

62 Na Yesus a xuuse, “Tamo Piran fo xel a mataa xena vil a faisok sina e nane kaalum fa'ulaa xe sina maana mo sina ti la xavala, nane pife fexaxaas sena faisok lana fatataganan sina Piran.”